لاہور(پاکستان خبر) وزیراعلیٰ پنجاب مریم نواز شریف نے کہا ہے کہ ایک اچھا استاد معاشرے میں مثبت تبدیلی کی بنیاد رکھنے میں اہم کردار ادا کرسکتا ہے۔اساتذہ کے عالمی دن کے موقع پر اپنے خصوصی پیغام میں مریم نواز شریف نے معلم اعظم حضرت محمد ﷺ پر کروڑوں درود و سلام پیش کیا اور اساتذہ کو شاندار خراجِ تحسین پیش کیا۔انہوں نے کہا کہ وہ اپنے گرامی قدر اساتذہ سمیت ہر معلم کو سلام پیش کرتی ہیں اور یومِ اساتذہ پر پنجاب کے لاکھوں اساتذہ کی محنت، اخلاص اور لگن کو سراہتی ہیں۔ استاد کا مرتبہ اور عظمت لازوال ہے جبکہ اپنے شفیق اساتذہ کے لیے آج بھی عزت و احترام کا جذبہ برقرار ہے۔وزیراعلیٰ پنجاب کا کہنا تھا کہ اساتذہ معاشرے کا سب سے معتبر طبقہ ہیں اور استاد ہی طالب علم کو فرش سے عرش تک پہنچانے میں کردار ادا کرتا ہے۔ اچھا استاد صرف علم نہیں دیتا بلکہ طلبہ کو ادب، اخلاقی اقدار اور معاشرتی روایات سے بھی روشناس کراتا ہے۔مریم نواز نے کہا کہ اچھا استاد معاشرے میں مثبت تبدیلیوں کی بنیاد رکھ سکتا ہے۔ حکومت پنجاب معیاری تعلیم کے فروغ کے لیے صوبے بھر میں نواز شریف اسکول آف ایمننس جیسے پروگرام متعارف کرا رہی ہے، جبکہ طلبہ کو جدید علوم و فنون سے روشناس کرانے کے لیے پرائمری تعلیم میں مصنوعی ذہانت بھی متعارف کرائی جا رہی ہے۔انہوں نے کہا کہ اساتذہ کو انگریزی بول چال، معلوماتی ٹیکنالوجی اور جدید تدریسی طریقوں سے آگاہ کرنے کے لیے مفت تربیت فراہم کی جا رہی ہے۔
