اسلام آباد( کامرس ڈیسک)ملک میں مائع پٹرولیم گیس (ایل پی جی) کی ممکنہ ذخیرہ اندوزی اور مصنوعی قلت کے خدشے کے پیش نظر پٹرولیم ڈویژن نے آئل اینڈ گیس ریگولیٹری اتھارٹی (اوگرا) کو خط لکھ کر ضروری قانونی اور انتظامی اقدامات کرنے کی درخواست کردی۔پٹرولیم ڈویژن کے خط میں بتایا گیا ہے کہ ملکی ضروریات پوری کرنے کے لیے ایل پی جی درآمد کی جارہی ہے، تاہم اطلاعات موصول ہوئی ہیں کہ درآمدات کے باوجود ٹرمینلز سے گیس باقاعدگی سے نہیں اٹھائی جارہی۔خط کے مطابق اس صورتحال کے باعث ایل پی جی کی ذخیرہ اندوزی کا خدشہ ہے، جس سے مقامی مارکیٹ میں مصنوعی قلت پیدا ہونے اور قیمتوں میں اضافے کا امکان ہے۔پٹرولیم ڈویژن نے اوگرا سے کہا ہے کہ ذخیرہ اندوزی کی روک تھام کے لیے مؤثر اقدامات کیے جائیں اور درآمدی ٹرمینلز سے ایل پی جی کی باقاعدہ ترسیل کے ساتھ طلب والے علاقوں تک اس کی فراہمی بھی یقینی بنائی جائے۔خط میں اوگرا کو ضروری قانونی و انتظامی کارروائی شروع کرنے کی ہدایت کرتے ہوئے کہا گیا ہے کہ صارفین کو ایل پی جی کی بلاتعطل فراہمی برقرار رکھنے کے لیے اقدامات کیے جائیں۔پٹرولیم ڈویژن کے مطابق پہاڑی اور دور دراز علاقوں سمیت وہ مقامات جو قومی گیس نیٹ ورک سے منسلک نہیں، وہاں صارفین کا انحصار ایل پی جی پر زیادہ ہے۔ اس لیے گیس کی مصنوعی قلت اور قیمتوں میں غیر ضروری اضافے کو روکنا انتہائی ضروری ہے۔
