ریٹائرڈ روبوٹس کو پگھلانے کی انوکھی تجویز، آرنلڈ شوارزنیگر کا مشورہ

 کیلیفورنیا( ویب ڈیسک) انسان نما روبوٹس تیار کرنے والی امریکی کمپنی فِیگر نے اپنے تقریباً دو سال پرانے روبوٹس ریٹائر کرنے کے بعد انہیں ختم کرنے کے لیے غیر معمولی طریقہ اختیار کیا۔کمپنی کے بانی اور سربراہ بریٹ ایڈکاک نے سماجی رابطے کی ویب سائٹ پر صارفین سے پوچھا کہ ریٹائر کیے جانے والے روبوٹس کو کس انداز میں الوداع کہا جائے۔اس سوال پر ہالی ووڈ اداکار آرنلڈ شوارزنیگر کی تجویز سب سے زیادہ مقبول ہوئی۔ انہوں نے مختصر مشورہ دیا کہ روبوٹس کو پگھلا دیا جائے۔ شوارزنیگر 1984ء کی مشہور فلم دی ٹرمینیٹر میں ایک سائبورگ قاتل کا کردار ادا کرچکے ہیں۔فِیگر نے روبوٹس کو پگھلانے کے لیے امریکا اور میکسیکو کی متعدد دھاتی فاؤنڈریوں سے رابطہ کیا، تاہم لیتھیم آئن بیٹریوں سے لیس ان روبوٹس کو قیمتی صنعتی مشینری میں ڈالنے پر کوئی فاؤنڈری تیار نہ ہوئی۔بالآخر کیلیفورنیا میں قائم کمپنی نے روبوٹس کو فن لینڈ کے شہر ایمترا کی ایک فاؤنڈری منتقل کیا، جہاں انہیں پگھلانے کا عمل مکمل کیا گیا۔کمپنی کے مطابق اس طریقے کے لیے خصوصی تیاری اور تربیت درکار تھی، تاہم روایتی طریقوں کے مقابلے میں یہ عمل زیادہ مؤثر ثابت ہوا۔فِیگر کے مطابق جدید ٹیکنالوجی اور خصوصی آلات سے لیس روبوٹس کے پورے بیڑے کو آخری مرحلے تک پہنچانا آسان نہیں تھا۔ یوں دی ٹرمینیٹر کے مشہور جملے ’’میں واپس آؤں گا‘‘ کے برعکس ان روبوٹس کی دوبارہ واپسی کا کوئی امکان نہیں رہا۔