کیلیفورنیا( ویب ڈیسک) چیٹ جی پی ٹی استعمال کرنے والے صارفین کو نئے آن لائن فراڈ سے محتاط رہنے کی ہدایت کی گئی ہے، جس میں سائبر مجرمان جعلی پیغامات اور لنکس کے ذریعے صارفین کو نقصان دہ ویب سائٹس تک پہنچانے کی کوشش کر رہے ہیں۔رپورٹس کے مطابق فراڈ کا آغاز اس وقت ہوتا ہے جب صارف گوگل پر چیٹ جی پی ٹی تلاش کرتا ہے۔ تلاش کے نتائج میں اسپانسرڈ اشتہار کے ذریعے بظاہر اسے چیٹ جی پی ٹی کی اصل ویب سائٹ تک پہنچایا جاتا ہے، تاہم وہاں ایک جعلی کسٹم جی پی ٹی موجود ہوتا ہے جو ہر سوال کے جواب میں مخصوص پیغام دکھاتا ہے۔جعلی پیغام میں دعویٰ کیا جاتا ہے کہ بنیادی ڈومین پر سروس کی دستیابی محدود ہے، جبکہ صارف کو چیٹ جی پی ٹی پلس میں اپ گریڈ کرنے یا کسی متبادل ڈومین پر جانے کا مشورہ دیا جاتا ہے۔فراڈ کو حقیقی ظاہر کرنے کیلئے جعلی کسٹم جی پی ٹی کو ’پلس 5.6‘ کا نام دیا گیا ہے، جس سے عام صارف اسے کسی نئے ماڈل یا چیٹ جی پی ٹی پلس کی اصل سہولت سمجھ سکتا ہے۔ماہرین کے مطابق خطرناک مرحلہ اس وقت شروع ہوتا ہے جب صارف متبادل یا بیک اپ ڈومین پر جانے کیلئے دیے گئے لنک پر کلک کرتا ہے۔ ایسے روابط اسے نقصان دہ ویب سائٹس تک پہنچا سکتے ہیں، جہاں کمپیوٹر میں نقصان دہ سافٹ ویئر نصب ہونے یا حساس معلومات چوری ہونے کا خطرہ ہوتا ہے۔سائبر سکیورٹی ماہرین نے صارفین کو مشورہ دیا ہے کہ سرچ انجن میں دکھائی دینے والے اسپانسرڈ روابط پر بلا سوچے سمجھے کلک نہ کریں، مشکوک اپ گریڈ پیغامات اور متبادل ڈومینز سے محتاط رہیں اور کسی بھی غیرمعمولی لنک پر جانے سے پہلے ویب ایڈریس کی تصدیق ضرور کریں۔
