مقبوضہ مغربی کنارہ( مانیٹرنگ ڈیسک)امریکا میں اسرائیل کے سفیر ییچیل لیٹر کا بیٹا مقبوضہ مغربی کنارے میں فلسطینی شخص کے گاڑی سے کیے گئے حملے میں شدید زخمی ہوگیا۔میڈیا رپورٹس کے مطابق اسرائیلی سفیر نے سماجی رابطے کی ویب سائٹ پر بیان میں کہا کہ ان کے بیٹے کی زندگی بچانے کے لیے معجزے کی ضرورت ہے۔فوج اور قانون نافذ کرنے والے اداروں کے مطابق فلسطینی شخص نے بیت ہورون کی بستی کے قریب اپنی گاڑی سکیورٹی چوکی سے ٹکرا دی، جس کے نتیجے میں ایک فوجی شدید زخمی ہوا۔اسرائیلی فورسز کے مطابق حملے کے بعد ملزم نے فرار ہونے کی کوشش کی، جس پر اہلکاروں نے فائرنگ کرکے اسے ہلاک کردیا۔ فلسطینی وزارت صحت نے حملہ آور کی شناخت محمود سلیمان کے نام سے کی ہے۔رپورٹس کے مطابق اسرائیلی سفیر کے بڑے بیٹے یدیدیا لیٹر بھی اسرائیلی فوج میں خدمات انجام دے چکے تھے اور 7 اکتوبر کے حملے کے بعد غزہ میں ہلاک ہوگئے تھے۔
