کراچی( کامرس ڈیسک) آبنائے ہرمز کے ذریعے توانائی کی ترسیل میں بڑھتی غیر یقینی صورتحال کے پیش نظر حکومت نے اکتوبر کے دوران قطر سے ایل این جی کے 3 کارگو حاصل کرنے کا فیصلہ کرلیا۔ذرائع کے مطابق حکومت ایل این جی کارگوز کی محفوظ اور بلاتعطل آمدورفت یقینی بنانے کے لیے ایرانی حکام سے رابطے کی تیاری بھی کررہی ہے تاکہ سمندری راستے میں ممکنہ رکاوٹ سے بچا جاسکے۔یہ پیشرفت ایسے وقت میں سامنے آئی ہے جب قطر انرجی نے پاکستان کو ایل این جی کی فراہمی سے متعلق فورس میجور کی مدت میں 4 نومبر تک توسیع کردی ہے۔دوسری جانب حکام نے خدشہ ظاہر کیا ہے کہ توانائی کی فراہمی میں رکاوٹ آئندہ موسم سرما کے دوران بھی برقرار رہ سکتی ہے، جس کے باعث ملک میں گیس کے ممکنہ بحران سے نمٹنے کے لیے فوری اور متبادل اقدامات کیے جارہے ہیں۔
