راولپنڈی(پاکستان خبر) مالدیپ کی عوامی مجلس کے سپیکر عبدالرحیم عبداللہ نے جنرل ہیڈکوارٹرز کا دورہ کیا، جہاں چیف آف آرمی اسٹاف، چیف آف ڈیفنس فورسز فیلڈ مارشل سید عاصم منیر سے ملاقات کی۔پاک فوج کے شعبہ تعلقات عامہ کے مطابق ملاقات میں باہمی دلچسپی کے امور، علاقائی سلامتی کی صورتحال اور پاکستان و مالدیپ کے درمیان دوطرفہ تعاون پر تبادلہ خیال کیا گیا۔فیلڈ مارشل عاصم منیر نے پاکستان اور مالدیپ کے درمیان برادرانہ تعلقات کو اہمیت دینے کے عزم کا اعادہ کیا، جبکہ دونوں ممالک کے باہمی مفاد پر مبنی روابط مزید مضبوط بنانے پر بھی اتفاق کیا گیا۔آئی ایس پی آر کے مطابق مالدیپ کی عوامی مجلس کے سپیکر نے علاقائی امن و استحکام کے فروغ میں پاکستان کے تعمیری کردار کو سراہا۔ملاقات میں دوطرفہ روابط کو مزید مستحکم کرنے اور باہمی دلچسپی کے مختلف شعبوں میں تعاون بڑھانے کی خواہش کا اظہار بھی کیا گیا۔
