کراچی( کامرس ڈیسک)سیکیورٹیز اینڈ ایکسچینج کمیشن آف پاکستان نے رضاکارانہ پنشن اسکیم کے تحت نیا کم لاگت سرمایہ کاری منصوبہ متعارف کرایا ہے، جسے یکم جنوری 2027 سے پیش کیا جائے گا۔ ’’پیسو ایکویٹی ذیلی فنڈ‘‘ کا مقصد پنشن بچت کرنے والوں کو حصص بازار میں آسان اور کم خرچ سرمایہ کاری کی سہولت دینا ہے۔نئے فنڈ میں مخصوص بازار اشاریے کی پیروی کرتے ہوئے سرمایہ کاری کی جائے گی، جبکہ فنڈ منتظمین براہ راست اشاریے کو ٹریک کرنے یا پاکستان اسٹاک ایکسچینج میں درج ایکسچینج ٹریڈڈ فنڈز میں سرمایہ کاری کے ذریعے اسے چلا سکیں گے۔یہ فنڈ موجودہ ایکویٹی، قرض اور منی مارکیٹ ذیلی فنڈز کے ساتھ دستیاب ہوگا، جس سے بچت کنندگان کو فعال اور غیر فعال سرمایہ کاری میں انتخاب کا موقع ملے گا۔ ایکسچینج ٹریڈڈ فنڈز پر مبنی آپشن کی سالانہ انتظامی فیس زیادہ سے زیادہ صفر اعشاریہ 75 فیصد ہوگی۔ایس ای سی پی کے چیئرمین ڈاکٹر کبیر احمد سدھو کے مطابق اس اقدام سے ریٹائرمنٹ بچت کے لیے بہتر اور سستے مواقع میسر آئیں گے اور قومی پنشن نظام کو مزید مستحکم کرنے میں مدد ملے گی۔
