ریاض( مانیٹرنگ ڈیسک)سعودی اتحادی افواج اور یمنی فورسز کا حوثی ملیشیا کے خلاف آپریشن فجر الیمن جاری ہے، تعز شہر میں کارروائی کے دوران حوثی ملیشیا کے 250 جنگجو ہلاک اور متعدد زخمی ہوگئے۔سعودی اتحادی افواج کے مطابق صعدہ شہر میں حوثی ملیشیا کے بیلسٹک میزائلوں کا ذخیرہ تباہ کردیا گیا، جبکہ دارالحکومت صنعا میں بیلسٹک میزائل لانچر بھی نشانہ بنایا گیا۔اتحادی افواج نے بتایا کہ کارروائیوں کا مقصد باب المندب میں بحری آمدورفت کا تحفظ یقینی بنانا ہے۔ حوثی ملیشیا کے اسلحہ ڈپو، کشتیوں کے گودام اور سمندری بارودی سرنگیں بھی تباہ کردی گئیں۔سعودی اتحادی افواج کے مطابق الحدیدہ گورنریٹ میں بھی فوجی کارروائی کی گئی، جس کے دوران جنوبی بحیرہ احمر کے آبی راستوں پر ممکنہ حملوں کی سازش ناکام بنادی گئی۔خیال رہے کہ گزشتہ روز یمنی اور اتحادی افواج نے باب المندب اور ذباب ریجن کا کنٹرول دوبارہ حاصل کیا تھا۔دوسری جانب یمن کی حوثی ملیشیا نے سعودی دارالحکومت ریاض کے ہوائی اڈے اور آرامکو تنصیبات پر حملے کرنے کا دعویٰ کیا ہے۔
