پاکستان جرمنی کا تجارت، سرمایہ کاری اور کاروباری تعاون بڑھانے پر اتفاق

اسلام آباد( کامرس ڈیسک)وفاقی وزیر تجارت جام کمال خان اور جرمن سفیر اینا لیپل کے درمیان ملاقات میں دونوں ممالک نے باہمی تجارت، سرمایہ کاری اور کاروباری تعاون کو وسعت دینے پر اتفاق کیا۔ جام کمال خان نے جرمن کمپنیوں کو پاکستان میں سرمایہ کاری کی دعوت دی، جبکہ جرمن سفیر نے جی ایس پی پلس سے متعلق پاکستان کی اصلاحات کو سراہا۔ملاقات میں پاکستانی باسمتی چاول کی جغرافیائی شناخت کے معاملے پر بھی گفتگو ہوئی۔ رانا احسان افضل نے باسمتی کے کاشتکاروں، پیداوار کنندگان اور برآمد کنندگان کے مفادات کے تحفظ پر زور دیا۔ جرمن سفیر نے جغرافیائی شناخت کے مؤثر تحفظ کو زرعی برآمدات کے لیے اہم قرار دیا۔جرمن سفیر کے مطابق پاکستان میں زراعت، غذائی اشیا کی تیاری، ٹیکنالوجی اور صنعتی پیداوار کے شعبوں میں سرمایہ کاری کے وسیع امکانات موجود ہیں۔ وزیر تجارت نے جرمن کمپنیوں کو نومبر میں کراچی میں ہونے والی فوڈ ایگ 2026 میں شرکت کی دعوت دی، جسے جرمن سفیر نے سراہا۔جرمن سفیر نے بتایا کہ جرمنی میں مویشیوں کی تجارتی نمائش کے لیے پاکستانی کاروباری وفد کی تیاری جاری ہے۔ انہوں نے جام کمال خان کو 29 سے 31 اکتوبر کو سیول میں ہونے والی ایشیا بحرالکاہل جرمن کاروباری کانفرنس میں شرکت کی دعوت بھی دی، جس پر وزیر تجارت نے شرکت کے امکانات کا جائزہ لینے میں دلچسپی ظاہر کی۔