پاکستان سعودی عرب کی سلامتی اور خودمختاری کے تحفظ میں ساتھ کھڑا ہے، وزیراعظم

اسلام آباد (پاکستان خبر) وزیراعظم شہباز شریف نے کہا ہے کہ پاکستان سعودی عرب کی خودمختاری، سلامتی اور علاقائی سالمیت کے تحفظ کے لیے برادر ملک کے شانہ بشانہ کھڑا ہے۔وزیراعظم محمد شہباز شریف سے سعودی عرب کے نومنتخب سفیر ڈاکٹر راجح طامی البقمی نے ملاقات کی۔ اس موقع پر وزیراعظم نے ان کا خیرمقدم کیا اور نئی ذمہ داریاں سنبھالنے پر مبارکباد دی۔شہباز شریف نے کہا کہ حالیہ برسوں میں پاکستان اور سعودی عرب کے تعلقات میں نمایاں پیش رفت ہوئی ہے۔ انہوں نے مختلف شعبوں میں دوطرفہ تعاون کو مزید فروغ دینے اور موجودہ ادارہ جاتی نظام کو مضبوط بنانے کے پاکستان کے عزم کا اعادہ کیا۔وزیراعظم نے سعودی عرب پر حوثی حملوں میں حالیہ اضافے کی شدید مذمت کرتے ہوئے کہا کہ پاکستان اور سعودی عرب ہمیشہ مشکل وقت میں ایک دوسرے کے ساتھ کھڑے رہے ہیں۔ان کا کہنا تھا کہ اسٹریٹجک باہمی دفاعی معاہدہ اور مکہ مشترکہ دفاعی اتحاد دونوں ممالک کے دیرینہ برادرانہ تعلقات میں اہم تاریخی سنگِ میل ہیں، جو خطے میں امن و سلامتی کے لیے ان کے مشترکہ عزم کی عکاسی کرتے ہیں۔شہباز شریف نے ایک بار پھر واضح کیا کہ پاکستان سعودی عرب کی خودمختاری، سلامتی اور علاقائی سالمیت کے تحفظ کے لیے مکمل حمایت جاری رکھے گا۔وزیراعظم نے پاکستان کو طویل عرصے سے اقتصادی اور مالی معاونت فراہم کرنے پر سعودی قیادت کا شکریہ بھی ادا کیا۔ملاقات کے اختتام پر شہباز شریف نے سعودی سفیر کے لیے نئی ذمہ داریوں میں کامیابی کی نیک خواہشات کا اظہار کیا اور دونوں ممالک کے دیرینہ برادرانہ تعلقات کو مزید مضبوط بنانے کے لیے پاکستان کی جانب سے بھرپور تعاون کا یقین دلایا۔