پشاور (پاکستان خبر) دیر کالونی میں نجی اسکول کی چھت گرنے کے افسوسناک واقعے سے متعلق ریسکیو 1122 نے ابتدائی رپورٹ مرتب کرلی ہے، جس میں امدادی کارروائیوں کی تفصیلات سامنے آئی ہیں۔رپورٹ کے مطابق 15 اکتوبر کو صبح 8 بج کر 48 منٹ پر پہلی ہنگامی کال موصول ہوئی، جس کے بعد ریسکیو کنٹرول روم نے ابتدائی طور پر دو ایمبولینسز جائے حادثہ کی جانب روانہ کیں۔رپورٹ میں بتایا گیا ہے کہ اطلاع ملنے کے پانچ منٹ کے اندر ایمبولینسز جائے وقوع پر پہنچ گئیں۔ حادثے کی سنگینی کا اندازہ ہونے کے بعد فوری طور پر مزید امدادی اقدامات کیے گئے اور مجموعی طور پر 20 ایمبولینسز اور 100 ریسکیو اہلکاروں کو روانہ کیا گیا۔ریسکیو 1122 کی ابتدائی رپورٹ کے مطابق جائے حادثہ سے مجموعی طور پر 56 متاثرہ افراد کو نکالا گیا، جبکہ امدادی ٹیموں نے ملبے تلے دبے زخمیوں کو فوری طور پر نکالنے اور طبی امداد فراہم کرنے کے لیے کارروائیاں کیں۔
