اسلام آباد( کامرس ڈیسک) وزیراعظم محمد شہباز شریف نے موسم سرما کے دوران گیس کی لوڈ مینجمنٹ کے لیے جامع منصوبہ تیار کرنے اور تمام ضروری پیشگی اقدامات یقینی بنانے کی ہدایت کردی۔وزیراعظم کی زیر صدارت موسم سرما میں گیس لوڈ مینجمنٹ سے متعلق اجلاس ہوا، جس میں متعلقہ حکام نے گیس کی طلب و رسد اور موسم سرما کے لیے کیے جانے والے انتظامات پر بریفنگ دی۔اجلاس کو بتایا گیا کہ مقامی گیس کی فراہمی میں گھریلو صارفین کو ترجیح دی جائے گی، جبکہ بجلی کی پیداوار اور صنعتی ضروریات پوری کرنے کے لیے درآمدی مائع قدرتی گیس کو ترجیح حاصل ہوگی۔گھریلو صارفین میں مقامی گیس کے بجائے متبادل ذرائع توانائی کے استعمال کو فروغ دینے کے لیے عوامی آگاہی مہم بھی شروع کی جائے گی۔بریفنگ میں بتایا گیا کہ شمالی علاقوں میں موجود گیس کے ذخائر سے بلا تعطل فراہمی یقینی بنانے کے لیے اقدامات جاری ہیں۔ وزیراعظم نے موجودہ علاقائی صورتحال کے پیش نظر گیس کی بلاتعطل درآمد کے لیے بھی تمام ضروری اقدامات کرنے کی ہدایت کی۔اجلاس میں پانی گرم کرنے اور گھروں کو گرم رکھنے کے لیے بجلی سے چلنے والے آلات کے استعمال کی حوصلہ افزائی کے لیے بینکوں سے مالی معاونت کی سہولت متعارف کرانے کی تجویز پر بھی غور کیا گیا۔اجلاس میں وفاقی وزرا رانا تنویر حسین، احد خان چیمہ، محمد اورنگزیب، علی پرویز ملک، وزیراعظم کے مشیر ہارون اختر، وزیر مملکت بلال اظہر کیانی اور متعلقہ اعلیٰ سرکاری حکام نے شرکت کی۔
