اسلام آباد( کامرس ڈیسک)وزیراعظم شہباز شریف نے پاکستان ریلوے میں اصلاحات اور مین لائن ون منصوبے پر کام کی رفتار بڑھانے کی ہدایت کرتے ہوئے کہا ہے کہ ریلوے کو مضبوط، منافع بخش اور مالی طور پر خود کفیل بنانے کے لیے کارپوریٹ بنیادوں پر اصلاحات ضروری ہیں۔وزیراعظم کی زیر صدارت اجلاس میں مین لائن ون، ریلوے اراضی کے بہتر استعمال اور ادارے کی مالی و انتظامی کارکردگی کا جائزہ لیا گیا۔ شہباز شریف نے قبضہ شدہ ریلوے اراضی کی واگزاری کے لیے قومی احتساب بیورو اور وزارت ریلوے کی مشترکہ کوششوں کو سراہا اور کہا کہ مین لائن ون کی بہتری مسافروں کو بہتر سہولتوں اور مال برداری میں اضافے کے لیے انتہائی اہم ہے۔وزیراعظم نے ریلوے کی قیمتی زمین کو تجارتی بنیادوں پر استعمال کرکے منصوبے کی تعمیر کے لیے وسائل پیدا کرنے کی اصولی منظوری بھی دی۔ متعلقہ حکام کو ہدایت کی گئی کہ دو ہفتوں میں اراضی کی تجارتی استعداد اور ممکنہ مالی وسائل سے متعلق جامع منصوبہ پیش کیا جائے۔اجلاس کو بتایا گیا کہ ایک ہزار 726 کلومیٹر طویل مین لائن ون منصوبہ کراچی، روہڑی، ملتان، لاہور اور پشاور کے چار حصوں پر مشتمل ہے۔ کراچی، روہڑی حصے کے لیے بین الاقوامی مالی معاونت جبکہ دیگر حصوں کے لیے ملکی وسائل سے رقم فراہم کرنے کا منصوبہ بنایا گیا ہے۔
