واشنگٹن( مانیٹرنگ ڈیسک)امریکی نائب صدر جے ڈی وینس نے کہا ہے کہ امریکا نے برطانیہ کے فضائی اڈے سے اپنے بی ون بمبار طیارے احتیاطی طور پر واپس بلا لیے ہیں۔جے ڈی وینس کے مطابق یہ فیصلہ امریکی اہلکاروں کو ممکنہ خطرے سے محفوظ رکھنے کے لیے کیا گیا۔ یہ طیارے برطانیہ کے آر اے ایف فیئر فورڈ اڈے پر تعینات تھے اور حالیہ دنوں میں ایران کے خلاف امریکی کارروائیوں میں استعمال ہوئے تھے۔یہ پیش رفت ایسے وقت ہوئی ہے جب گزشتہ ہفتے اڈے کے قریب پانچ برطانوی شہریوں کو مبینہ دہشت گردانہ کارروائی کی تیاری کے شبے میں گرفتار کیا گیا تھا۔بعد ازاں ایک برطانوی ایرانی شہری کو بھی حراست میں لیا گیا، تاہم تمام مشتبہ افراد کو ضمانت پر رہا کردیا گیا ہے۔نیٹو کے فوجی ذرائع کے مطابق برطانیہ میں موجود امریکی تنصیبات کو ایران سے شدید خطرہ درپیش ہے۔ ایران نے اڈے پر مبینہ سازش میں ملوث ہونے کے الزامات کو بے بنیاد قرار دیا ہے۔
