کیلیفورنیا( ویب ڈیسک) واٹس ایپ نے بیٹا صارفین کیلئے نئے آف لائن وائس ٹو ٹیکسٹ فیچر کی آزمائش شروع کردی ہے، جس کے ذریعے انٹرنیٹ کے بغیر آواز کو تحریری پیغام میں تبدیل کیا جاسکے گا۔اس سہولت کے تحت صارف کو وائس پیغام بھیجنے کے بجائے صرف اپنی بات ریکارڈ کرنا ہوگی، جسے واٹس ایپ تحریری متن میں بدل دے گا۔ تاہم تیار شدہ پیغام دوسرے شخص کو بھیجنے کیلئے انٹرنیٹ کنکشن ضروری ہوگا۔رپورٹ کے مطابق فیچر استعمال کرنے کیلئے صارف کو ابتدائی طور پر مطلوبہ زبان کا پیکج اپنے فون میں ڈاؤن لوڈ کرنا ہوگا، جس کے بعد آواز کو متن میں تبدیل کرنے کا عمل انٹرنیٹ کے بغیر مکمل ہوسکے گا۔یہ سہولت فی الحال واٹس ایپ بیٹا کے 2.26.37.8 ورژن میں محدود صارفین کیلئے دستیاب ہے اور اس کی کارکردگی و استحکام کا جائزہ لیا جارہا ہے۔ کامیاب آزمائش کے بعد اسے آئندہ اپ ڈیٹ کے ذریعے مزید صارفین کیلئے پیش کیا جاسکتا ہے۔
