بغیر کھڑکیوں کے جدید مسافر طیارے کی تیاری، پہلی آزمائشی پرواز 2027 میں متوقع

 کیلیفورنیا( ویب ڈیسک) امریکی اسٹارٹ اپ کمپنی جیٹ زیرو ایک منفرد ڈیزائن کا حامل جدید مسافر طیارہ تیار کر رہی ہے، جو روایتی ہوائی جہازوں سے مختلف ہوگا۔ زیڈ 4 نامی اس طیارے میں 250 مسافروں کے سفر کرنے کی گنجائش ہوگی، جبکہ یہ ایک مرتبہ میں 5 ہزار میل تک پرواز کر سکے گا۔کیلیفورنیا میں قائم کمپنی نے اس طیارے کی پہلی آزمائشی پرواز 2027 میں کرنے کا منصوبہ بنایا ہے۔ جیٹ زیرو اس نئے ڈیزائن کے ذریعے بوئنگ جیسے بڑے طیارہ ساز اداروں کے مقابلے میں اپنی جگہ بنانے کی تیاری کر رہی ہے۔زیڈ 4 کی سب سے نمایاں خصوصیت اس کا ’’بلینڈڈ وِنگ باڈی‘‘ ڈیزائن ہے، جس میں طیارے کے مرکزی حصے اور پروں کو الگ رکھنے کے بجائے ایک مربوط اور ہموار ساخت میں ڈھالا گیا ہے۔ اس کا مجموعی خاکہ سمندر میں پائی جانے والی اسٹنگ رے مچھلی سے مشابہت رکھتا ہے۔کمپنی نے بوئنگ 767 جیسے روایتی مسافر طیاروں کے برعکس زیادہ چوڑی اور نسبتاً کم اونچائی والی ساخت اختیار کی ہے۔ طیارے کے اندر مختلف حصے بنانے کے ساتھ نشستوں کو بھی زیادہ کشادہ رکھنے کا منصوبہ ہے، تاکہ مسافروں کو سفر کے دوران ایک منفرد تجربہ فراہم کیا جا سکے۔اس جدید طیارے کی ایک اور حیران کن خصوصیت یہ ہے کہ اس میں روایتی کھڑکیاں نہیں ہوں گی۔فضائی صنعت میں زیڈ 4 کو نئے طرز کے مسافر طیارے کی تیاری کی جانب ایک اہم پیش رفت قرار دیا جا رہا ہے۔ تاہم، اس کی حقیقی کارکردگی، پرواز کی صلاحیتوں اور عملی افادیت کا حتمی اندازہ آزمائشی مراحل مکمل ہونے کے بعد ہی لگایا جا سکے گا۔