عالمی منڈی میں خام تیل کی قیمتوں میں کمی کا رجحان جاری

 اسلام آباد( کامرس ڈیسک) عالمی منڈی میں خام تیل کی قیمتوں میں کمی کا رجحان جاری ہے، جہاں امریکی اور برطانوی خام تیل کی قیمتوں میں مزید کمی ریکارڈ کی گئی ہے۔تازہ اعداد و شمار کے مطابق امریکی خام تیل کی قیمت 1.27 ڈالر کمی کے بعد 67.31 ڈالر فی بیرل ہو گئی، جبکہ برطانوی برینٹ خام تیل 1.17 ڈالر کمی کے بعد 70.40 ڈالر فی بیرل پر آ گیا۔رپورٹ کے مطابق عالمی معیار کے خام تیل مارچ کے بعد اپنی کم ترین سطح پر بند ہوئے ہیں، جو عالمی توانائی مارکیٹ میں سرمایہ کاروں کے اعتماد اور بدلتی ہوئی سفارتی صورتحال کی عکاسی کرتا ہے۔تجزیہ کاروں کا کہنا ہے کہ اگر واشنگٹن اور تہران کے درمیان تعلقات میں بہتری آتی ہے تو ایرانی تیل کی عالمی منڈی میں رسد بڑھنے کے باعث قیمتوں میں مزید کمی ممکن ہے۔