اسلام آبا د(پاکستان خبر) قومی اسمبلی کے اجلاس میں جمعیت علمائے اسلام (جے یو آئی) کے سربراہ مولانا فضل الرحمان نے وزیر دفاع خواجہ آصف کو تنقید کا نشانہ بناتے ہوئے ان ہی کا مشہور جملہ ’’کوئی شرم ہوتی ہے، کوئی حیا ہوتی ہے‘‘ دہرا دیا۔اجلاس سے خطاب کرتے ہوئے مولانا فضل الرحمان نے کہا کہ ایران میں دفاعی معاہدے ہو رہے ہیں اور وزیر دفاع یہاں بیٹھے ہیں، کیا یہ بھی وزارت داخلہ کا کام ہے؟ انہوں نے خواجہ آصف کو مخاطب کرتے ہوئے کہا کہ انہیں اپنی عزت و وقار کا خیال رکھنا چاہیے۔مولانا فضل الرحمان نے ملکی امور اور وزرا کی ذمہ داریوں پر سوالات اٹھاتے ہوئے حکومت اور اپوزیشن سے مطالبہ کیا کہ وہ مل بیٹھ کر ’’جمہوریت کا نیا چارٹر‘‘ مرتب کریں۔واضح رہے کہ خواجہ آصف نے ماضی میں قومی اسمبلی میں تحریک انصاف کے ارکان پر تنقید کرتے ہوئے یہی جملہ استعمال کیا تھا، جو بعد میں سوشل میڈیا پر مقبول میم بن گیا۔ اس بار مولانا فضل الرحمان کی جانب سے یہ جملہ خواجہ آصف کے خلاف استعمال کیے جانے پر سوشل میڈیا صارفین نے بھی توجہ دلائی، جبکہ وزیر دفاع اس وقت ایوان میں موجود تھے۔
