اسلام آبا د(پاکستان خبر)بانی پی ٹی آئی عمران خان کی بہن نورین خان نیازی کی طبیعت خراب ہونے اور انہیں کوٹ لکھپت جیل سے پنجاب انسٹیٹیوٹ آف کارڈیالوجی منتقل کیے جانے کی اطلاعات پر پاکستان تحریک انصاف نے گہری تشویش کا اظہار کیا ہے۔وکیل رانا مدثر عمر کے مطابق نورین نیازی کو دل میں تکلیف ہوئی ہے اور ان کے ابتدائی ٹیسٹ کیے جا رہے ہیں۔پی ٹی آئی کے مرکزی میڈیا ڈیپارٹمنٹ کے بیان میں کہا گیا ہے کہ نورین نیازی کی اسپتال منتقلی کے بارے میں اہلِ خانہ کو اطلاع نہیں دی گئی۔ پارٹی کے مطابق اگر یہ اطلاعات درست ہیں تو یہ انسانی ہمدردی، شفافیت اور زیرِ حراست افراد کے بنیادی حقوق کے منافی ہے۔پی ٹی آئی نے نورین نیازی کی مبینہ غیر قانونی نظر بندی اور صحت کو لاحق خطرات پر حکومت پنجاب اور متعلقہ حکام سے فوری وضاحت طلب کرتے ہوئے انہیں ماہر امراضِ قلب کی نگرانی میں بہترین طبی سہولیات فراہم کرنے، ضروری ٹیسٹ اور علاج بلا تاخیر یقینی بنانے اور ان کی صحت سے متعلق مستند معلومات اہلِ خانہ کو دینے کا مطالبہ کیا ہے۔بیان میں اہلِ خانہ کو نورین نیازی سے ملاقات اور ان کی خیریت دریافت کرنے کی اجازت دینے پر بھی زور دیا گیا، جبکہ پارٹی نے ان کی جلد صحت یابی کے لیے دعا کی اپیل کی ہے۔
