اسلام آباد( پاکستان خبر) نائب وزیراعظم اور وزیر خارجہ اسحاق ڈار نے کہا ہے کہ یورپی یونین پاکستان کا ایک اہم اور مضبوط تجارتی شراکت دار ہے۔اسلام آباد میں نائب وزیراعظم اسحاق ڈار اور کروشیا کے وزیر خارجہ کی مشترکہ صدارت میں ایک اجلاس ہوا، جس میں دونوں ممالک کے درمیان دوطرفہ تعلقات، باہمی تعاون اور علاقائی و عالمی معاملات پر تبادلہ خیال کیا گیا۔اجلاس کے دوران نائب وزیراعظم اسحاق ڈار نے کروشین وزیر خارجہ کو پاکستان اور بھارت کے درمیان حالیہ کشیدگی سے متعلق صورتحال سے آگاہ کیا۔اس موقع پر کروشیا کے وزیر خارجہ نے کہا کہ پاکستان کا یہ ان کا پہلا سرکاری دورہ ہے، جس پر انہوں نے دعوت دینے پر نائب وزیراعظم کا شکریہ ادا کیا۔انہوں نے کہا کہ آج کا دن دونوں ممالک کے درمیان تعلقات اور تعاون کے مختلف پہلوؤں پر بات چیت کے لیے اہم موقع فراہم کرتا ہے۔ پاکستان اور کروشیا کے درمیان خوشگوار تعلقات قائم ہیں۔کروشین وزیر خارجہ کا کہنا تھا کہ دنیا کو اس وقت متعدد چیلنجز کا سامنا ہے، اس لیے ان مسائل سے نمٹنے کے لیے تمام ممالک کو مل کر کام کرنے کی ضرورت ہے۔
