اسلام آباد( کامرس ڈیسک)وفاقی حکومت نے صوبوں سے نئے ترقیاتی ایجنڈے اور جاری منصوبوں پر عملدرآمد سے متعلق تفصیلی رپورٹس طلب کر لی ہیں۔حکومت نے صوبائی منصوبہ بندی وزراء کا چوتھا اجلاس جلد طلب کرنے کا فیصلہ کیا ہے، جس کے لیے پلاننگ کمیشن نے تمام صوبوں سے ورکنگ پیپرز فوری جمع کرانے کی ہدایت جاری کر دی ہے۔پلاننگ کمیشن کے مطابق گزشتہ اجلاس میں کیے گئے فیصلوں پر عملدرآمد کی رپورٹس 25 جولائی تک فراہم کرنے کا کہا گیا ہے۔ تمام رپورٹس کا جائزہ آئندہ اہم بین الصوبائی اجلاس میں لیا جائے گا۔ اس حوالے سے پنجاب، سندھ، بلوچستان، آزاد کشمیر اور گلگت بلتستان کو مراسلے بھی جاری کر دیے گئے ہیں۔وفاق نے صوبوں سے زرعی شعبے، صحت، ہیپاٹائٹس، ذیابیطس اور ماسٹر پلان سے متعلق فیصلوں پر ہونے والی پیش رفت کی تفصیلات طلب کی ہیں۔ حکام یہ بھی جائزہ لیں گے کہ زرعی، صحت اور برآمدات کے حوالے سے کیے گئے فیصلوں پر عملی پیش رفت ہوئی یا نہیں۔رپورٹ میں غیر قانونی ہاؤسنگ سوسائٹیز کے خلاف اقدامات اور شہروں کے بے ہنگم پھیلاؤ کو روکنے کے منصوبوں پر بھی پیش رفت طلب کی گئی ہے۔وفاقی حکومت نے ہیپاٹائٹس، ذیابیطس اور آبادی کنٹرول پروگرامز کی کارکردگی، کسانوں کو بیج، کھاد اور دیگر زرعی سہولیات کی فراہمی، جبکہ برآمدات میں اضافے کے لیے ضلعی سطح پر کیے گئے اقدامات کی تفصیلات بھی مانگ لی ہیں۔پلاننگ کمیشن کے آئندہ اجلاس میں ہیپاٹائٹس سی کے خاتمے کے قومی منصوبے پر عملدرآمد کا بھی جائزہ لیا جائے گا۔
