دیامر( پاکستان خبر) گزشتہ رات دیامر کی مختلف وادیوں میں آنے والے شدید سیلابی ریلوں نے بڑے پیمانے پر تباہی مچا دی، جس کے باعث متعدد مکانات، فصلیں، رابطہ پل اور دیگر اہم تنصیبات کو نقصان پہنچا ہے۔مقامی پولیس کے مطابق سیلابی ریلوں سے درخت، پن چکیاں اور واٹر چینلز بھی تباہ ہوئے، جبکہ شاہراہِ قراقرم مختلف مقامات پر لینڈ سلائیڈنگ کے باعث متاثر ہوئی ہے۔رپورٹس کے مطابق چلاس میں گونر فارم نرسری کے قریب سیلابی ریلے کے بعد شاہراہِ قراقرم رات سے ٹریفک کے لیے بند ہے، جس کے نتیجے میں سڑک کے دونوں اطراف گاڑیوں کی طویل قطاریں لگ گئی ہیں۔پھنسے ہوئے مسافروں میں خواتین، بچے اور بزرگ بھی شامل ہیں، جنہیں شدید مشکلات کا سامنا ہے۔ مسافروں نے حکومت سے مطالبہ کیا ہے کہ شاہراہِ قراقرم کو جلد از جلد ٹریفک کے لیے بحال کیا جائے۔دوسری جانب متاثرہ علاقوں میں نقصانات کا جائزہ لینے، ملبہ ہٹانے اور سڑکوں و پلوں کی بحالی کے لیے متعلقہ اداروں کی کارروائیاں جاری ہیں۔
