نیویارک( ویب ڈیسک) ٹیکنالوجی کمپنی گوگل نے صارفین کے اکاؤنٹس کو مزید محفوظ بنانے کے لیے ایک نیا سکیورٹی فیچر متعارف کرا دیا ہے، جس کے تحت اب صارفین سیلفی ویڈیو کے ذریعے اپنے گوگل اکاؤنٹ تک دوبارہ رسائی حاصل کر سکیں گے۔کمپنی کے مطابق اس فیچر کے استعمال کے لیے صارف کو ابتدا میں ایک مختصر سیلفی ویڈیو ریکارڈ کرنا ہوگی، جس میں کیمرے کی جانب دیکھتے ہوئے چند آسان ہدایات پر عمل کرنا ہوگا تاکہ چہرے کے مختلف زاویوں کی تصدیق کی جا سکے۔گوگل کا کہنا ہے کہ اگر صارف مستقبل میں اپنا پاس ورڈ بھول جائے تو وہ نئی سیلفی ویڈیو ریکارڈ کر کے اپنی شناخت کی تصدیق کے بعد اکاؤنٹ میں دوبارہ لاگ اِن کر سکے گا۔کمپنی کے مطابق نئی ویڈیو کا موازنہ پہلے سے محفوظ شدہ ویڈیو سے کیا جائے گا اور شناخت کی تصدیق ہونے پر صارف کو اکاؤنٹ تک رسائی دے دی جائے گی۔ صارف کسی بھی وقت اپنے اکاؤنٹ سے محفوظ کی گئی سیلفی ویڈیو حذف بھی کر سکتا ہے۔گوگل نے واضح کیا ہے کہ یہ ویڈیو صرف اکاؤنٹ کی تصدیق اور لاگ اِن کے عمل کے لیے استعمال کی جائے گی، جب تک صارف خود کسی اضافی مقصد کے لیے اس کے استعمال کی اجازت نہ دے۔کمپنی کے مطابق محفوظ کی گئی سیلفی ویڈیوز کو انکرپٹڈ طریقے سے ذخیرہ کیا جائے گا، جبکہ جعلی تصاویر، ویڈیوز اور ڈیپ فیک کے ذریعے دھوکا دہی سے بچاؤ کے لیے اس فیچر میں متعدد جدید سکیورٹی اقدامات بھی شامل کیے گئے ہیں۔
