اسلام آباد( کامرس ڈیسک) وفاقی وزارت خزانہ نے رواں مالی سال کے دوران ہائبرڈ سکوک بانڈز جاری کرنے کا فیصلہ کر لیا ہے، جس کے ذریعے حکومت مارکیٹ سے مالی وسائل حاصل کرے گی۔وزارت خزانہ کے ذرائع کے مطابق اثاثے گروی رکھنے کے ساتھ ساتھ حکومت کموڈیٹی فروخت کرکے بھی مارکیٹ سے فنانسنگ حاصل کر سکے گی۔ کموڈیٹی کی فروخت کے عمل کے لیے حکومت تیسرے فریق کی خدمات حاصل کرے گی۔ذرائع کا کہنا ہے کہ ہائبرڈ سکوک فنانسنگ کے تحت کموڈیٹی کو مارکیٹ میں ہی فروخت کیا جائے گا۔ رواں مالی سال میں پہلی مرتبہ ہائبرڈ سکوک بانڈز جاری کیے جائیں گے، جبکہ اس منصوبے کی تفصیلات عالمی مالیاتی ادارے سے بھی شیئر کی جائیں گی۔وزارت خزانہ نے نیشنل ہائی وے اتھارٹی سے سکوک بانڈز کے اجرا کے لیے اثاثوں کی تفصیلات طلب کر لی ہیں۔ ذرائع کے مطابق این ایچ اے کے اثاثوں کی موجودہ مالیت کا تخمینہ 7 ہزار ارب روپے سے زائد لگایا گیا ہے۔ذرائع نے بتایا کہ گزشتہ مالی سال این ایچ اے کے اثاثوں کی مالیت کا تخمینہ تقریباً ساڑھے 5 ہزار ارب روپے تھا، جبکہ اضافی اثاثوں کی مالیت کے تعین کے بعد اسی بنیاد پر سکوک بانڈز کے اجرا کا فیصلہ کیا جا سکے گا۔
