بلوچستان میں سیکیورٹی فورسز کا انٹیلی جنس آپریشن، 19 دہشت گرد ہلاک، 11 اہلکار شہید

 کو ئٹہ( پاکستان خبر) بلوچستان میں سیکیورٹی فورسز نے انٹیلی جنس اطلاعات کی بنیاد پر کارروائی کرتے ہوئے فتنۃ الہندوستان سے تعلق رکھنے والے 19 دہشت گردوں کو ہلاک جبکہ متعدد کو زخمی کر دیا۔سیکیورٹی ذرائع کے مطابق آپریشن قومی شاہراہ این-25 پر جھاؤ کراس اور کرارو کے درمیان کیا گیا، جہاں دہشت گرد مسافروں اور مقامی شہریوں سے بھتہ وصول کرنے میں مصروف تھے۔ذرائع کا کہنا ہے کہ سیکیورٹی فورسز نے بروقت کارروائی کرتے ہوئے دہشت گردوں کے ٹھکانے کو نشانہ بنایا، جس کے نتیجے میں 19 دہشت گرد مارے گئے جبکہ متعدد زخمی ہو گئے۔آپریشن کے دوران وطن کے دفاع میں لڑتے ہوئے سیکیورٹی فورسز کے 11 بہادر جوان شہید ہو گئے۔سیکیورٹی ذرائع نے واضح کیا کہ عوام کے جان و مال، قومی شاہراہوں کے تحفظ اور بلوچستان کے امن کو سبوتاژ کرنے کی ہر کوشش کا بھرپور جواب دیا جائے گا، جبکہ دہشت گرد عناصر کے خلاف کارروائیاں بلا تعطل جاری رہیں گی۔