تہران (مانیٹرنگ ڈیسک)تازہ امریکی حملوں کے جواب میں ایران نے کویت اور بحرین میں موجود امریکی فوجی اڈوں کو میزائل اور ڈرون حملوں سے نشانہ بنانے کا دعویٰ کیا ہے۔ایرانی سرکاری ٹی وی کے مطابق کویت میں کیمپ عریفجان اور علی السالم جبکہ بحرین میں جفیر اور شیخ عیسیٰ کے فوجی اڈوں کو ہدف بنایا گیا۔ایرانی پاسداران انقلاب نے جاری بیان میں خبردار کیا ہے کہ اگر امریکا کی جانب سے مزید حملے کیے گئے تو خطے میں موجود دیگر امریکی فوجی اڈوں کو بھی نشانہ بنایا جا سکتا ہے۔پاسداران انقلاب کے مطابق امریکی حملوں میں مشہد جانے والے دو پل بھی متاثر ہوئے، جسے ایران نے آیت اللہ علی خامنہ ای کے جنازے کے اجتماع کو متاثر کرنے کی کوشش قرار دیا۔ایرانی میڈیا کے مطابق بندر عباس، بوشہر، چابہار، کنارک اور ایرانشہر سمیت مختلف علاقوں میں حملے کیے گئے، جبکہ اہواز شہر میں ہونے والی کارروائی کے نتیجے میں 3 افراد جاں بحق اور متعدد زخمی ہوئے۔ایرانی فوج کے مطابق گزشتہ روز بندر عباس اور بوشہر پر کیے گئے حملوں میں فضائیہ اور بحریہ کے 8 اہلکار بھی ہلاک ہوئے۔
