اسلام آباد( کامرس ڈیسک)ادارہ شماریات کی جانب سے جاری کردہ مہنگائی سے متعلق تازہ رپورٹ کے مطابق جون 2026 میں ملک میں مہنگائی کی سالانہ شرح 11.07 فیصد ریکارڈ کی گئی ہے۔رپورٹ میں بتایا گیا ہے کہ جون کے دوران مہنگائی کی یہ شرح وزارتِ خزانہ کے 11 سے 12 فیصد کے تخمینے کے مطابق رہی، یعنی مجموعی صورتحال حکومتی اندازوں کے قریب رہی۔ادارہ شماریات کے مطابق مئی کے مقابلے میں جون کے دوران ماہانہ بنیاد پر مہنگائی میں 0.30 فیصد کمی ریکارڈ کی گئی، جبکہ مئی میں سالانہ مہنگائی کی شرح 11.66 فیصد تھی۔اعداد و شمار کے مطابق دیہی اور شہری دونوں علاقوں میں بھی ماہانہ بنیاد پر مہنگائی میں کمی دیکھی گئی۔ دیہی علاقوں میں مہنگائی میں 0.03 فیصد کمی ریکارڈ ہوئی، جبکہ شہری علاقوں میں یہ شرح 0.47 فیصد کم رہی۔مزید بتایا گیا ہے کہ جون کے دوران دیہی علاقوں میں مہنگائی کی سالانہ شرح 10.92 فیصد رہی، جو مجموعی قومی شرح سے کچھ کم ہے۔رپورٹ کے مطابق مجموعی طور پر مہنگائی میں معمولی کمی کا رجحان دیکھا گیا ہے، تاہم شرح اب بھی دو ہندسوں میں برقرار ہے۔
