اسلام آباد( پاکستان خبر) وزیراعظم شہباز شریف نے پاکستان آرمی کے چیف آف جنرل اسٹاف لیفٹیننٹ جنرل عامر رضا، ہلالِ امتیاز (ملٹری)، ستارۂ بسالت کو فور اسٹار جنرل کے عہدے پر ترقی دینے اور انہیں کمانڈر نیشنل اسٹریٹجک کمانڈ مقرر کرنے کا اعلان کر دیا۔وزیراعظم آفس کے مطابق شہباز شریف نے جنرل عامر رضا کو ترقی اور نئی ذمہ داری سنبھالنے پر مبارکباد دی اور ان کے لیے نیک خواہشات کا اظہار کیا۔وزیراعظم نے کہا کہ انہیں یقین ہے کہ جنرل عامر رضا قومی سلامتی سے متعلق اس اہم منصب کی ذمہ داری پیشہ ورانہ صلاحیت، عزم اور لگن کے ساتھ انجام دیں گے۔کمانڈر نیشنل اسٹریٹجک کمانڈ کا عہدہ ملک کی دفاعی حکمت عملی اور اسٹریٹجک صلاحیتوں کے حوالے سے انتہائی اہم سمجھا جاتا ہے۔ جنرل عامر رضا کی فور اسٹار جنرل کے عہدے پر ترقی کو پاکستان کی عسکری قیادت میں ایک اہم پیش رفت قرار دیا جا رہا ہے۔
