تہران( کامرس ڈیسک)ایران اور امریکہ کے درمیان مذاکرات میں پیش رفت کی توقعات کے باعث عالمی منڈی میں تیل کی قیمتوں میں کمی ریکارڈ کی گئی ہے۔برینٹ خام تیل کے اگست کے سودے 75 سینٹ یا 1.03 فیصد کمی کے بعد 72.40 ڈالر فی بیرل پر آ گئے، جبکہ ستمبر کے معاہدے کی قیمت 40 سینٹ یا 0.54 فیصد کمی کے ساتھ 73.51 ڈالر فی بیرل تک گر گئی۔امریکی ویسٹ ٹیکساس انٹرمیڈیٹ خام تیل بھی 47 سینٹ یا 0.66 فیصد سستا ہو کر 70.32 ڈالر فی بیرل پر آ گیا۔مارکیٹ تجزیہ کار ٹم واٹرر کے مطابق سرمایہ کار دوحہ مذاکرات کے مثبت نتائج کی امید کے پیش نظر قیمتوں کا تعین کر رہے ہیں، تاہم آبنائے ہرمز کے ذریعے تیل کی ترسیل کی مکمل بحالی کے واضح آثار تاحال سامنے نہیں آئے۔انہوں نے کہا کہ عالمی منڈی محتاط انداز میں پُرامید ہے، لیکن سرمایہ کار خطے میں کشیدگی میں حقیقی کمی کے ٹھوس شواہد سامنے آنے تک محتاط حکمت عملی اختیار کیے ہوئے ہیں۔
