اسلام آباد( کامرس ڈیسک)پاکستان نے ملکی تاریخ میں پہلی بار 4,722 ارب روپے سے زائد قرض مقررہ مدت سے پہلے واپس کرکے ایک اہم مالیاتی سنگ میل عبور کرلیا۔مشیر وزیر خزانہ خرم شہزاد کے مطابق پاکستان اب تک تقریباً 17 ارب امریکی ڈالر کے مساوی قرض قبل از وقت ادا کرچکا ہے، جبکہ مالی سال 2026 کے دوران اب تک 2,900 ارب روپے کا قرض مقررہ وقت سے پہلے واپس کیا گیا ہے۔انہوں نے بتایا کہ مالی سال 2026 میں قرض کی قبل از وقت ادائیگی مالی سال 2025 کے مقابلے میں 62 فیصد زیادہ رہی۔ واپس کیے گئے قرض میں 51 فیصد حصہ اسٹیٹ بینک جبکہ 49 فیصد دیگر مالیاتی اداروں کے قرض پر مشتمل ہے۔خرم شہزاد کے مطابق بہتر مالیاتی حکمت عملی کے باعث پاکستان کا قرضہ برائے مجموعی قومی پیداوار (جی ڈی پی) کا تناسب 75 فیصد سے کم ہوکر تقریباً 68.5 فیصد رہ گیا ہے۔انہوں نے کہا کہ قرضوں کے مؤثر انتظام سے سرمایہ کاروں کا اعتماد بحال ہوا ہے اور ملکی مالیاتی استحکام میں بہتری آئی ہے۔ بہتر قرض نظم و نسق کے ذریعے پاکستان ایک مضبوط، پائیدار اور کم لاگت مالیاتی نظام کی جانب آگے بڑھ رہا ہے۔
