پاکستان کا تجارتی خسارہ 39.5 ارب ڈالر تک پہنچ گیا، برآمدات میں کمی اور درآمدات میں اضافہ

 اسلام آباد( کامرس ڈیسک) ادارہ شماریات نے مالی سال 2025-26 کے بیرونی تجارت کے اعداد و شمار جاری کر دیے ہیں جن کے مطابق پاکستان کا تجارتی خسارہ 39.5 ارب ڈالر ریکارڈ کیا گیا ہے۔اعداد و شمار کے مطابق مالی سال 2025-26 میں تجارتی خسارے میں سالانہ بنیاد پر 21.6 فیصد اضافہ ہوا، جبکہ مجموعی برآمدات 30.126 ارب ڈالر رہیں، جن میں تقریباً 6 فیصد کمی ریکارڈ کی گئی۔اسی عرصے میں درآمدات بڑھ کر 69.597 ارب ڈالر تک پہنچ گئیں، جو سالانہ بنیاد پر 7.9 فیصد اضافہ ظاہر کرتی ہیں۔رپورٹ کے مطابق صرف جون 2026 میں برآمدات 16.7 فیصد کمی کے ساتھ 2.239 ارب ڈالر رہیں، جبکہ درآمدات 24.1 فیصد اضافے کے ساتھ 6.767 ارب ڈالر تک پہنچ گئیں، جس کے نتیجے میں ماہانہ تجارتی خسارہ 4.528 ارب ڈالر ریکارڈ کیا گیا۔اعداد و شمار کے مطابق جون کے دوران تجارتی خسارے میں مئی کے مقابلے میں 63.8 فیصد اضافہ ہوا، جبکہ سالانہ بنیاد پر بھی خسارے میں نمایاں اضافہ دیکھا گیا۔