اسلام آباد( ویب ڈیسک) پاکستان کے انفارمیشن ٹیکنالوجی (آئی ٹی) شعبے نے مالی سال 2025-26 میں برآمدات کا نیا ریکارڈ قائم کرتے ہوئے 4.5 ارب ڈالر کا ہندسہ عبور کر لیا۔رپورٹ کے مطابق گزشتہ مالی سال کے 3.475 ارب ڈالر کے مقابلے میں آئی ٹی برآمدات میں تقریباً 29 فیصد اضافہ ریکارڈ کیا گیا، جو اس شعبے کی تیز رفتار ترقی کا مظہر ہے۔آئی ٹی برآمدات میں اضافے کی بڑی وجوہات میں سافٹ ویئر ڈویلپمنٹ، بزنس پراسیس آؤٹ سورسنگ (بی پی او)، سافٹ ویئر بطور سروس (ساس) اور گیمنگ انڈسٹری کی نمایاں ترقی شامل ہے۔پاکستانی آئی ٹی کمپنیوں نے جاپان، سنگاپور اور ایشیا پیسیفک کے دیگر ممالک میں اپنی موجودگی مضبوط بنا کر برآمدی آمدن میں اضافہ کیا، جبکہ چھوٹے اور درمیانے درجے کے ٹیکنالوجی اداروں کی نئی عالمی منڈیوں تک رسائی نے بھی اس کامیابی میں اہم کردار ادا کیا۔ماہرین کے مطابق پاکستانی ڈیجیٹل خدمات کی عالمی سطح پر بڑھتی ہوئی طلب، نئی مارکیٹس میں توسیع اور بین الاقوامی اعتماد میں اضافہ آئی ٹی برآمدات میں نمایاں اضافے کی بنیادی وجوہات ہیں۔ انہوں نے کہا کہ یہ پیش رفت پاکستان کے ڈیجیٹل شعبے کی مضبوط ہوتی صلاحیت اور عالمی معیشت سے بڑھتے روابط کی عکاس ہے۔
