اسلام آباد( پاکستان خبر) وزیراعظم شہباز شریف نے گلگت بلتستان کے عوام کی ترقی اور فلاح و بہبود کے لیے نو منتخب حکومت کے ساتھ مل کر کام کرنے کے عزم کا اظہار کیا ہے۔وزیراعظم شہباز شریف سے وزیراعلیٰ گلگت بلتستان امجد حسین نے ملاقات کی، جس میں خطے کے مختلف امور، ترقیاتی منصوبوں اور عوامی مسائل پر تبادلہ خیال کیا گیا۔ملاقات کے دوران وزیراعظم نے امجد حسین کو وزیراعلیٰ گلگت بلتستان کا منصب سنبھالنے پر مبارکباد دی۔وزیراعظم شہباز شریف نے کہا کہ وفاقی حکومت گلگت بلتستان کے عوام کی بہتری کے لیے نو منتخب حکومت کے ساتھ مکمل تعاون کرے گی۔ انہوں نے کہا کہ وفاقی حکومت علاقے میں قابل تجدید توانائی، سیاحت، انفراسٹرکچر، صحت، تعلیم اور دیگر شعبوں میں ترقیاتی منصوبوں پر کام کر رہی ہے۔انہوں نے بتایا کہ وفاقی منصوبوں میں 100 میگاواٹ شمسی توانائی منصوبہ اور دانش اسکولوں کا قیام نمایاں اہمیت رکھتے ہیں، جبکہ عوامی سہولت کے لیے گلگت میں پاکستان آسان خدمت مرکز قائم کرنے کی منصوبہ بندی بھی کی جا رہی ہے۔ملاقات میں نائب وزیراعظم و وزیر خارجہ محمد اسحاق ڈار، وزیر منصوبہ بندی احسن اقبال اور وزیر اقتصادی امور احد خان چیمہ بھی شریک تھے۔
