پی ٹی آئی رکن اسمبلی کا جلال خان کی شہریت پر سوال، تحقیقات کا مطالبہ

پشاور( پاکستان خبر) پاکستان تحریک انصاف (پی ٹی آئی) کے رکن خیبرپختونخوا اسمبلی عبدالغنی آفریدی نے پاکستان مسلم لیگ (ن) کے رکن صوبائی اسمبلی جلال خان کی شہریت سے متعلق سوالات اٹھاتے ہوئے اسپیکر خیبرپختونخوا اسمبلی کو باضابطہ خط ارسال کر دیا۔عبدالغنی آفریدی نے خط میں مؤقف اختیار کیا کہ جلال خان کی شہریت اور آئینی و قانونی اہلیت سے متعلق اہم سوالات موجود ہیں، جن کی شفاف اور غیر جانبدارانہ تحقیقات کی ضرورت ہے۔انہوں نے اسپیکر خیبرپختونخوا اسمبلی سے مطالبہ کیا کہ معاملے کا نوٹس لیتے ہوئے الیکشن کمیشن اور دیگر متعلقہ اداروں کو باضابطہ ریفرنس یا مراسلہ بھجوایا جائے تاکہ جلال خان کی شہریت اور اسمبلی رکنیت کے حوالے سے مکمل جانچ کی جا سکے۔پی ٹی آئی رہنما نے کہا کہ اگر تحقیقات میں یہ ثابت ہو جائے کہ جلال خان آئینی تقاضے پورے نہیں کرتے تھے تو ان کے خلاف قانون کے مطابق کارروائی کی جائے۔عبدالغنی آفریدی کا کہنا تھا کہ وہ اپنے مؤقف پر قائم ہیں اور متعلقہ اداروں کی جانب سے کی جانے والی قانونی کارروائی میں مکمل تعاون کے لیے تیار ہیں۔