لاہور( پاکستان خبر) وزارت اطلاعات و ثقافت پنجاب اور امریکی قونصل خانے لاہور نے ثقافت کے شعبے میں باہمی تعاون کو مزید فروغ دینے پر اتفاق کیا ہے۔صوبائی وزیر اطلاعات عظمیٰ بخاری سے امریکی قونصل جنرل لاہور سٹیٹسن سینڈرز نے ملاقات کی، جس میں سیکرٹری اطلاعات طاہر رضا ہمدانی اور سیاسی و معاشی مشیر صدف سعد بھی شریک ہوئے۔ملاقات کے دوران امریکی قونصل جنرل نے پنجاب فلم سٹی کے قیام اور صوبے میں تھیٹر کے فروغ کے لیے کیے جانے والے اقدامات کو سراہا۔ اس موقع پر لاہور میں امریکی فنکاروں اور الحمراء آرٹس کونسل کے درمیان مشترکہ شراکت داری کے قیام پر بھی تبادلہ خیال کیا گیا۔عظمیٰ بخاری نے امریکی قونصل جنرل کو وزیراعلیٰ پنجاب مریم نواز کی جانب سے کیے جانے والے مختلف اقدامات سے آگاہ کیا۔صوبائی وزیر اطلاعات نے کہا کہ پنجاب حکومت خواتین، طلبہ اور کسانوں کے لیے تاریخی اقدامات کر رہی ہے۔ انہوں نے بتایا کہ صوبے میں اپنی چھت، اپنا گھر پروگرام کے تحت ایک لاکھ 70 ہزار گھروں کی تعمیر کا منصوبہ جاری ہے۔ملاقات کے اختتام پر عظمیٰ بخاری نے امریکی قونصل جنرل کو یادگاری تحفہ بھی پیش کیا۔
