پشاور( پاکستان خبر) خیبرپختونخوا میں گزشتہ 24 گھنٹوں کے دوران شدید بارشوں اور فلش فلڈ کے باعث مختلف حادثات میں 12 افراد جاں بحق جبکہ 15 زخمی ہو گئے۔صوبائی ڈیزاسٹر مینجمنٹ اتھارٹی (پی ڈی ایم اے) کے مطابق جاں بحق افراد میں 6 مرد، 5 بچے اور ایک خاتون شامل ہیں، جبکہ زخمیوں میں 8 مرد، 2 خواتین اور 5 بچے شامل ہیں۔پی ڈی ایم اے کے مطابق شدید بارشوں اور سیلابی ریلوں کے باعث مجموعی طور پر 14 گھروں کو نقصان پہنچا، جن میں سے 13 گھروں کو جزوی نقصان جبکہ ایک گھر مکمل طور پر تباہ ہوا۔رپورٹ کے مطابق بارشوں سے متاثرہ واقعات صوبے کے مختلف اضلاع میں پیش آئے، جن میں پشاور، خیبر، مردان، بونیر، باجوڑ، لوئر چترال، ایبٹ آباد، مانسہرہ، تورغر اور کرم شامل ہیں۔پی ڈی ایم اے، ریسکیو 1122، ضلعی انتظامیہ اور دیگر متعلقہ ادارے متاثرہ علاقوں میں امدادی سرگرمیوں میں مصروف ہیں اور صورتحال پر مسلسل نظر رکھے ہوئے ہیں۔ڈائریکٹر جنرل پی ڈی ایم اے نے متاثرہ اضلاع کی انتظامیہ کو ہدایت کی ہے کہ متاثرین کو فوری طور پر امدادی سامان فراہم کیا جائے اور ریسکیو و امدادی کارروائیوں کو مزید تیز کیا جائے۔پی ڈی ایم اے کے مطابق صوبے کے تمام بڑے دریاؤں، ندی نالوں اور آبی گزرگاہوں میں پانی کی سطح اور بہاؤ معمول کے مطابق ہے، تاہم محکمہ موسمیات کے مطابق بارشوں کا سلسلہ 23 جولائی تک وقفے وقفے سے جاری رہنے کا امکان ہے۔پی ڈی ایم اے نے تمام ضلعی انتظامیہ کو پہلے ہی الرٹ رہنے کی ہدایات جاری کر رکھی ہیں۔ عوام سے اپیل کی گئی ہے کہ غیر ضروری سفر سے گریز کریں، حساس سیاحتی مقامات کا رخ نہ کریں اور حکومتی اداروں کی جانب سے جاری کردہ حفاظتی ہدایات اور الرٹس پر عمل کریں۔
