بھارت کی ریاست منی پور میں کشیدگی، متعدد مکانات نذرِ آتش، گرفتاریاں

نئی دہلی( مانیٹرنگ ڈیسک) بھارت کی ریاست منی پور میں نسلی کشیدگی ایک بار پھر بڑھ گئی ہے، جہاں متعدد مکانات کو آگ لگانے کے واقعات کے بعد علاقے میں حالات مزید خراب ہو گئے ہیں۔بھارتی جریدے دی اسٹیٹ مین کے مطابق منی پور کے ضلع امپھال کے جنوبی علاقے میں نسلی فسادات کے دوران کئی گھروں کو نذرِ آتش کیا گیا، جس کے باعث علاقے میں خوف و ہراس پھیل گیا۔رپورٹ کے مطابق واقعات کے بعد بڑھتی ہوئی کشیدگی کے پیشِ نظر سکیورٹی فورسز کی بھاری نفری تعینات کر دی گئی ہے تاکہ صورتحال کو قابو میں رکھا جا سکے۔بھارتی جریدے کے مطابق واقعے میں مبینہ طور پر ملوث ہونے پر ہینگ جنگ گاؤں کے سربراہ سمیت دو افراد کو گرفتار کیا گیا ہے۔بھارتی انسانی حقوق کی کارکن نندتا ہاکسر نے منی پور کی صورتحال پر تشویش کا اظہار کرتے ہوئے کہا کہ حکومت کی جانب سے حالات کی اصل وجوہات کو نظر انداز کیا جا رہا ہے۔انہوں نے الزام عائد کیا کہ منی پور میں مسلسل ہونے والے پرتشدد واقعات ظاہر کرتے ہیں کہ حکومت امن و امان برقرار رکھنے میں ناکام رہی ہے۔