پاکستان اسٹاک مارکیٹ میں نوجوان سرمایہ کاروں کی بڑی دلچسپی، رجسٹریشن میں نمایاں اضافہ

کراچی( کامرس ڈیسک)پاکستان اسٹاک ایکسچینج میں نوجوان سرمایہ کاروں کی دلچسپی میں نمایاں اضافہ دیکھنے میں آ رہا ہے، جس کی بڑی وجہ ملک میں معاشی استحکام اور اسٹاک مارکیٹ کی بہتر کارکردگی کو قرار دیا جا رہا ہے۔عرب نیوز کی رپورٹ کے مطابق رواں مالی سال اگست سے مئی کے دوران 1 لاکھ 80 ہزار 148 نئے ریٹیل سرمایہ کار پاکستان اسٹاک ایکسچینج میں رجسٹر ہوئے ہیں، جو سرمایہ کاری کے بڑھتے ہوئے رجحان کی عکاسی کرتا ہے۔اعداد و شمار کے مطابق ان نئے رجسٹر ہونے والے سرمایہ کاروں میں 18 سے 30 سال کی عمر کے نوجوانوں کا حصہ 41 فیصد رہا، جن کی تعداد 74 ہزار 629 ریکارڈ کی گئی۔ رپورٹ میں بتایا گیا ہے کہ پاکستان اسٹاک ایکسچینج میں ہر ماہ اوسطاً 15 ہزار نئے اکاؤنٹس کھل رہے ہیں، جن میں تقریباً 40 فیصد نوجوان سرمایہ کار شامل ہوتے ہیں۔رپورٹ کے مطابق گزشتہ تین برسوں میں پاکستان اسٹاک مارکیٹ نے ڈالر کی بنیاد پر سالانہ اوسطاً 66 فیصد منافع دیا ہے، جو خطے میں سب سے زیادہ قرار دیا جا رہا ہے۔معاشی ماہرین کے مطابق حکومتی اصلاحات، بین الاقوامی مالیاتی ادارے (آئی ایم ایف) کے پروگرام اور مجموعی میکرو اکنامک استحکام نے اسٹاک مارکیٹ کی کارکردگی کو مضبوط بنانے میں اہم کردار ادا کیا ہے۔ماہرین کا کہنا ہے کہ بڑھتی ہوئی سرمایہ کاری، نوجوانوں کی فعال شرکت اور بہتر معاشی اشاریے پاکستان کی کیپٹل مارکیٹ کے روشن مستقبل کی جانب اشارہ کرتے ہیں۔