مقبوضہ مغربی کنارہ: صحافی، سفارت کاروں پر حملے، 10 اسرائیلی آبادکار گرفتار

مقبوضہ مغربی کنارہ: ( مانیٹرنگ ڈیسک) مقبوضہ مغربی کنارے میں امریکی صحافی اور یورپی سفارت کاروں پر تشدد کے الزامات کے تحت 10 مشتبہ اسرائیلی آبادکاروں کو گرفتار کر لیا گیا۔رپورٹ کے مطابق جمعہ کے روز نقاب پوش اسرائیلی آبادکاروں کو امریکی اخبار واشنگٹن پوسٹ کی فوٹو جرنلسٹ ہیڈی لیون پر حملہ کرتے ہوئے فلمایا گیا۔ امریکی شہری ہیڈی لیون مقبوضہ مغربی کنارے میں فلسطینیوں کی زیتون کی فصل کی کٹائی کی کوریج کر رہی تھیں۔حملے میں زخمی ہونے والی صحافی کو اسپتال منتقل کیا گیا، جہاں ان کی ایک انگلی کی سرجری کی گئی۔دوسری جانب مقبوضہ مغربی کنارے میں نقاب پوش اسرائیلی آبادکاروں نے فرانسیسی، بیلجیئم اور پولش سفارت کاروں کے علاوہ ایک فرانسیسی میئر پر بھی حملہ کیا۔ واقعے کے دوران بیلجیئم کی ایک سفارتی گاڑی کو بھی نقصان پہنچایا گیا۔امریکا، جو اسرائیل کا قریبی اتحادی ہے، نے آبادکاروں کے تشدد کے خلاف کارروائی اور واشنگٹن پوسٹ کی فوٹو جرنلسٹ پر حملے میں ملوث افراد کی گرفتاری پر زور دیا تھا۔ادھر فرانس، بیلجیئم اور پولینڈ نے بھی اپنے سفارت کاروں پر حملوں کے بعد اسرائیل سے ذمہ داروں کے خلاف کارروائی کا مطالبہ کیا تھا۔