امریکا اور اسرائیل کے حملوں کی صورت میں خلیج کی زیرِ سمندر مواصلاتی کیبلز نشانہ بنائی جائیں گی، ایران

تہران ( مانیٹرنگ ڈیسک) ایرانی حکام نے خبردار کیا ہے کہ امریکا اور اسرائیل کی جانب سے دوبارہ حملوں کی صورت میں خلیج میں زیرِ سمندر بچھائی گئی مواصلاتی کیبلز کو نشانہ بنانے کے تفصیلی منصوبے تیار کر لیے گئے ہیں۔یہ انتباہ ایسے وقت میں سامنے آیا ہے جب ایرانی حکام پہلے ہی خبردار کر چکے ہیں کہ واشنگٹن کے ساتھ سفارت کاری ناکام ہونے اور نئے تنازع کے آغاز کی صورت میں خطے میں موجود زیرِ سمندر مواصلاتی کیبلز بھی ممکنہ اہداف میں شامل ہو سکتی ہیں۔خبر رساں ادارے سے نام ظاہر نہ کرنے کی شرط پر گفتگو کرنے والے دو ایرانی حکام نے ممکنہ حملوں کے طریقہ کار یا اہداف کے مقامات سے متعلق تفصیلات فراہم نہیں کیں۔ایک اہلکار کے مطابق ایران کا مقصد حملے کے بعد زیرِ سمندر کیبلز کی مرمت میں رکاوٹ ڈالنا ہوگا، تاکہ انٹرنیٹ کنکشنز اور دیگر مواصلاتی نظام میں پیدا ہونے والا تعطل طویل عرصے تک برقرار رہے۔