مکہ مکرمہ، جدہ اور طائف سمیت چار سعودی شہروں میں ممکنہ خطرے کا الرٹ جاری، چند منٹ بعد واپس لے لیا گیا

ریاض ( مانیٹرنگ ڈیسک) سعودی عرب کے محکمہ شہری دفاع نے ملک کے مغربی حصے کے چار علاقوں مکہ مکرمہ، جدہ، طائف اور ساحلی شہر ینبع میں ممکنہ خطرے کے پیش نظر ہنگامی انتباہ جاری کیا، تاہم چند منٹ بعد ہی اسے واپس لے لیا گیا۔خبر رساں ادارے اے ایف پی کے مطابق، شہری دفاع نے ابتدائی طور پر متعلقہ علاقوں کے رہائشیوں کو ہدایت کی تھی کہ وہ فوری طور پر قریبی محفوظ مقام پر منتقل ہو جائیں۔مکہ مکرمہ مسلمانوں کے لیے مقدس ترین شہر ہے، جبکہ جدہ بحیرۂ احمر کے ساحل پر واقع سعودی عرب کا اہم شہر ہے۔الرٹ واپس لینے کے بعد بھی احتیاط کی ہدایتسعودی محکمہ شہری دفاع نے انتباہ واپس لینے کے باوجود شہریوں کو محتاط رہنے کی ہدایت کی۔ حکام نے میزائلوں اور ڈرونز کو روکنے یا ان کے خلاف کارروائی سے متعلق تصاویر اور معلومات سوشل میڈیا یا دیگر ذرائع پر شیئر کرنے کے خلاف قانونی تنبیہ بھی دہرائی۔رپورٹ میں فوری ہنگامی انتباہ جاری کرنے کی وجہ، میزائل یا ڈرون کی موجودگی اور کسی ممکنہ نقصان سے متعلق تفصیلات فراہم نہیں کی گئیں۔ اسی طرح الرٹ واپس لیے جانے کے بعد متعلقہ علاقوں میں کسی جانی یا مالی نقصان کی اطلاع بھی نہیں دی گئی۔