اب خوشبوئیں بھی آن لائن شیئر ہوں گی، ڈیجیٹل مہک کی نئی ٹیکنالوجی تیار

 کیلیفورنیا( ویب ڈیسک) محققین نے ایک جدید ٹیکنالوجی تیار کی ہے جو الیکٹرانک ناک کی مدد سے مختلف خوشبوؤں کی شناخت کرنے اور انہیں دوسری جگہ دوبارہ پیدا کرنے کی صلاحیت رکھتی ہے۔سینٹرونک (Scentronic) نامی اس ٹیکنالوجی میں پہلے الیکٹرانک ناک کسی مخصوص خوشبو کو شناخت کرتی ہے، جس کے بعد جسم پر پہنی جانے والی ایک ریموٹ ڈیوائس کو سگنل بھیجا جاتا ہے۔ یہ ڈیوائس خوشبودار سالمات خارج کرکے اصل مہک سے ملتی جلتی خوشبو پیدا کرتی ہے۔اوہائیو اسٹیٹ یونیورسٹی میں میٹریلز سائنس اینڈ انجینئرنگ کے ڈاکٹریٹ کے طالب علم اور تحقیق کے مرکزی مصنف چُن یو یانگ کے مطابق، یہ ٹیکنالوجی ایک مقام پر کسی خوشبو کو محسوس کرنے اور دوسرے مقام پر اس سے ملتی جلتی مہک دوبارہ پیدا کرنے کے عمل کو یکجا کرتی ہے۔چُن یو یانگ کا کہنا تھا کہ اس ٹیکنالوجی کا مقصد انٹرنیٹ پر تصاویر اور آوازوں کی طرح خوشبوؤں کو بھی شیئر کرنے کی سہولت فراہم کرنا ہے، تاکہ دور بیٹھے افراد کے ڈیجیٹل تجربات کو مزید حقیقی، دلچسپ اور جاندار بنایا جاسکے۔اس ٹیکنالوجی کی مدد سے مستقبل میں آن لائن رابطوں اور ڈیجیٹل تجربات میں خوشبو کا احساس بھی شامل ہونے کی راہ ہموار ہوسکتی ہے۔