مصنوعی ذہانت پر بڑھتے انحصار کے باعث بارکلے بینک کا 5 ہزار ملازمتیں ختم کرنے کا اعلان

لندن( ویب ڈیسک)برطانیہ کے بارکلے بینک نے اخراجات میں کمی اور مصنوعی ذہانت (اے آئی) کے استعمال میں اضافے کے لیے 2026 کے اختتام تک دنیا بھر میں 5 ہزار ملازمتیں ختم کرنے کا اعلان کردیا ہے۔رپورٹ کے مطابق یہ فیصلہ ایسے وقت میں سامنے آیا ہے جب مالی سال کی تیسری سہ ماہی کے دوران بینک کے منافع میں 13 فیصد اضافہ ریکارڈ کیا گیا۔بارکلے بینک کے جاری کردہ بیان میں کہا گیا ہے کہ ملازمتوں میں کٹوتی کا مقصد ادارے کے انتظامی امور کو آسان بنانا اور مصنوعی ذہانت کے ذریعے کارکردگی اور پیداواری صلاحیت میں اضافہ کرنا ہے۔بیان کے مطابق ختم کی جانے والی ملازمتوں میں 60 فیصد کا تعلق معاون شعبوں سے ہے، جہاں اے آئی کے استعمال سے ملازمین کی پیداواری صلاحیت میں اضافہ ہوا ہے۔بینک نے بتایا کہ اب تک ایک ہزار ملازمتیں ختم کی جاچکی ہیں، جبکہ مزید 4 ہزار ملازمتیں رواں سال کے اختتام تک ختم کردی جائیں گی۔اس اقدام کے نتیجے میں بینک کی عالمی افرادی قوت میں مجموعی طور پر 5 فیصد کمی متوقع ہے۔واضح رہے کہ بارکلے بینک نے اخراجات میں کمی کے لیے تین سالہ مہم شروع کر رکھی ہے، جس کا اختتام ملازمتوں میں کٹوتی کے اس اقدام کے ساتھ ہوگا۔