بھارتی پنجاب کے وزیراعلیٰ بھگونت مان کو لاہور میں عالمی پنجابی کانفرنس میں شرکت کی دعوت

چندی گڑھ (پاکستان خبر) بھارتی پنجاب کے وزیراعلیٰ بھگونت سنگھ مان کو لاہور میں ہونے والی عالمی پنجابی کانفرنس میں شرکت کی دعوت دے دی گئی، تاہم انہوں نے خدشہ ظاہر کیا ہے کہ بھارتی حکومت انہیں پاکستان جانے کی اجازت نہیں دے گی۔بھارتی میڈیا کے مطابق بھگونت مان نے مشرقی پنجاب اسمبلی کے اجلاس کے دوران بتایا کہ کانفرنس کے منتظمین، بالخصوص پنجابی شاعر بابا بشیر حسین ناظمی نے انہیں لاہور آنے کی دعوت دی ہے اور میزبانی کی پیشکش بھی کی ہے۔بھگونت مان نے طنزیہ انداز میں کہا کہ جب بھارتی حکومت انہیں فرانس اور جاپان جیسے ممالک کے دورے کی اجازت نہیں دیتی تو پاکستان جانے کی اجازت کیسے دے گی؟انہوں نے کہا کہ دونوں پنجابوں کی ثقافت مشترک ہے اور وہاں کے شاعر بھی لاہور آئیں گے، اس لیے وہ خود بھی کانفرنس میں شرکت کے خواہش مند ہیں۔اس موقع پر بھارتی پنجاب اسمبلی کے اسپیکر کلتار سنگھ سندھواں نے کہا کہ اگر وزیراعلیٰ کو پاکستان جانے کی اجازت مل جائے تو وہ انہیں ارکان اسمبلی کے ہمراہ لے جانے کے لیے بھی تیار ہیں۔اس پر بھگونت مان نے کہا کہ وہ چاہتے ہیں کہ اسپیکر، حکومتی اور اپوزیشن ارکان سمیت پوری اسمبلی کرتارپور صاحب جائے اور وہاں حاضری دے، تاہم اس کے لیے کرتارپور راہداری کھولنا ضروری ہے۔عالمی پنجابی کانفرنس 27 سے 29 نومبر تک لاہور میں ہوگیواضح رہے کہ لاہور میں عالمی پنجابی کانفرنس 27 سے 29 نومبر تک منعقد ہوگی۔ بھارتی میڈیا کے مطابق کانفرنس کا اہتمام پنجابی پرچار آرگنائزیشن، پنجابی لہرا اور پنجاب انسٹی ٹیوٹ آف لینگویج، آرٹ اینڈ کلچر کے اشتراک سے کیا جا رہا ہے۔کانفرنس میں 9 ممالک سے مہمانوں کی شرکت متوقع ہے، جبکہ بھگونت مان کی شرکت کا فیصلہ بھارتی حکومت کی اجازت سے مشروط ہوگا۔