راولپنڈی (پاکستان خبر) ستمبر 1965ء کی جنگ کے دسویں روز پاکستانی افواج نے بھرپور جوابی کارروائی کرتے ہوئے بھارتی فوج کو قصور سیکٹر سے پیچھے ہٹنے پر مجبور کردیا۔پاک فوج کے شدید حملے کے نتیجے میں جموں سے سیالکوٹ کی جانب پیش قدمی کی کوشش کرنے والی بھارتی فوج کو بھاری جانی و جنگی نقصان اٹھانا پڑا۔ دوارکا اور جام نگر کے نیول اور ایئربیس کو پاک فضائیہ کی جانب سے نشانہ بنائے جانے کے بعد بھارتی بحریہ اپنی فضائیہ کی ناکامی پر سخت برہم تھی۔لاہور سیکٹر کے قریب پاکستانی فوج نے چھوٹے ہتھیاروں سے فائرنگ کرتے ہوئے بھارت کے 2 جنگی طیارے بھی مار گرائے۔سیالکوٹ کے محاذ پر بھارتی فوج کے مزید 7 سینچورین ٹینک تباہ کیے گئے، جس کے بعد اس سیکٹر میں تباہ ہونے والے بھارتی ٹینکوں کی مجموعی تعداد 42 ہوگئی۔دراس سیکٹر میں مجاہدین نے مرال آباد کے مقام پر بھارتی فوج کے مضبوط ٹھکانوں کو تباہ کردیا۔ بحیرہ عرب میں پاک بحریہ کی برتری کے باعث بھارتی بحریہ کو اپنی سرگرمیاں محدود کرنے پر مجبور ہونا پڑا۔پاکستانی لڑاکا طیاروں نے بھارتی فوج کی مدد کے لیے آنے والے ایک طیارے کو لاہور کی فضاؤں میں ہی نشانہ بنا کر مار گرایا۔جنگ ستمبر کے دوران پاک فوج مختلف محاذوں پر بھارتی فوج کو مسلسل شدید نقصان پہنچا رہی تھی۔
