لبنان (مانیٹرنگ ڈیسک) لبنانی سکیورٹی ذرائع کے مطابق حزب اللہ نے ایران سے مالی امداد ملنے کے بعد اسرائیل کے ساتھ ممکنہ نئی جنگ کی تیاری گزشتہ 3 ماہ سے شروع کر رکھی ہے۔2024 کے بعد اسرائیل کے ساتھ 2 جنگوں میں حزب اللہ کو شدید نقصان پہنچا، اس کے ہزاروں جنگجو اور متعدد رہنما نشانہ بنے، جبکہ اسلحے کا بڑا حصہ تباہ ہوگیا۔اسرائیلی افواج نے جنوبی لبنان کے ان دیہاتوں پر قبضہ کر رکھا ہے جنہیں حزب اللہ کا گڑھ سمجھا جاتا ہے، جبکہ لبنانی حکومت پر بھی تنظیم کو غیر مسلح کرنے کے لیے سیاسی دباؤ بڑھ رہا ہے۔خبر رساں ادارے رائٹرز کے مطابق ان مشکلات کے باوجود حزب اللہ اسرائیل کے خلاف لڑنے کے لیے پُرعزم ہے۔ لبنانی سکیورٹی ذرائع نے بتایا کہ تنظیم نے جون کے بعد سے جنگی کارروائیوں میں وقفے کو دوبارہ مسلح ہونے کے لیے استعمال کیا، جس کے دوران دھماکہ خیز مواد حاصل کرنے اور ڈرونز تیار کرنے پر خصوصی توجہ دی گئی۔ذرائع کے مطابق ایران نے حزب اللہ کی فوجی صلاحیتیں بڑھانے کے لیے اسے کروڑوں ڈالر فراہم کیے ہیں۔ یہ رقم ایران کی جانب سے بے گھر خاندانوں کی مدد کے لیے دیے گئے تقریباً 20 کروڑ ڈالر کے علاوہ ہے۔
