لاہور ( سپورٹس ڈیسک) قازقستان میں ہونے والے ورلڈ نو میڈ مکسڈ مارشل آرٹس ٹورنامنٹ میں پاکستانی فائٹرز نے شاندار کارکردگی کا مظاہرہ کرتے ہوئے 4 چیمپئن شپ بیلٹس اور گولڈ میڈلز کے علاوہ 3 چاندی کے تمغے جیت لیے۔ پاکستان ایونٹ میں مجموعی طور پر دوسری پوزیشن حاصل کرنے میں کامیاب رہا۔قازقستان کے شہر کراگینڈا میں ہونے والے مقابلوں میں 4 پاکستانی فائٹرز نے چیمپئن شپ بیلٹس اور طلائی تمغے اپنے نام کیے۔ ان میں 65 کلوگرام کیٹیگری میں محمد سعد محسود، انڈر 19 کی 65 کلوگرام کیٹیگری میں اُسام تاجک، 60 کلوگرام میں شیرباز مری اور 55 کلوگرام میں سید کلیم اللہ شامل ہیں۔اس کے علاوہ 3 پاکستانی فائٹرز نے چاندی کے تمغے حاصل کیے، جن میں 60 کلوگرام کیٹیگری میں سلمان علی جبکہ خواتین کی 60 کلوگرام کیٹیگری میں شگفتہ آصف اور رابعہ نور شامل ہیں۔پاکستانی کھلاڑیوں کی مجموعی کارکردگی کے باعث قومی ٹیم نے ٹورنامنٹ میں دوسری پوزیشن حاصل کی۔
