ملک بھر میں ایل پی جی مہنگی، لاہور اور جڑواں شہروں میں 600 روپے فی کلو

 اسلام آباد( کامرس ڈیسک) ملک کے مختلف شہروں میں مائع پٹرولیم گیس (ایل پی جی) کی قیمتوں میں کمی نہ آسکی، لاہور، راولپنڈی اور اسلام آباد میں فی کلو قیمت 600 روپے تک پہنچ گئی ہے۔کراچی میں ایل پی جی 530 روپے فی کلو فروخت ہو رہی ہے، جبکہ کوئٹہ میں بھی قیمت 530 روپے فی کلو ہے۔ پشاور میں صارفین کو ایل پی جی 570 روپے فی کلو میں دستیاب ہے۔دوسری جانب ایل پی جی مارکیٹرز ایسوسی ایشن کے سینئر نائب چیئرمین علی حیدر نے جیو نیوز سے گفتگو کرتے ہوئے بتایا تھا کہ جہازوں کی آمد کے علاوہ ایران کے سرحدی راستے سے بھی سپلائی بحال ہوگئی ہے، تاہم اس وقت گاڑیوں کی کمی کا سامنا ہے۔علی حیدر نے امید ظاہر کی تھی کہ سپلائی کا نظام معمول پر آنے کے بعد آئندہ 48 گھنٹوں میں کراچی میں ایل پی جی کی عام قیمت 480 روپے فی کلو تک آ سکتی ہے۔