اسلام آباد (پاکستان خبر) وفاقی وزیر داخلہ محسن نقوی نے کہا ہے کہ افغانستان میں اس وقت 25 دہشتگرد تنظیمیں سرگرم ہیں جو عالمی امن کیلئے بڑا خطرہ ہیں۔محسن نقوی اور وزیر مملکت طلال چودھری سے اقوام متحدہ کے سیکرٹری جنرل انتونیو گوتریس نے ملاقات کی، جس میں عالمی و علاقائی صورتحال اور اقوام متحدہ کے امن مشنز سے متعلق امور پر تبادلہ خیال کیا گیا۔وفاقی وزیر داخلہ نے کہا کہ پاکستان دہشتگردی کے خلاف عالمی جنگ میں اپنا کردار ادا کر رہا ہے، عالمی برادری کو افغانستان میں موجود دہشتگرد تنظیموں کے خطرے سے نمٹنے کیلئے مشترکہ کوششیں کرنا ہوں گی۔انہوں نے کہا کہ پاکستان اقوام متحدہ کے امن مشنز میں اپنا کردار جاری رکھے گا، جبکہ پاکستانی پولیس افسران اور اہلکار بھی اقوام متحدہ پولیس میں خدمات انجام دے رہے ہیں۔ پاکستان امن مشنز میں 181 اہلکاروں کی جانوں کا نذرانہ پیش کر چکا ہے۔انتونیو گوتریس نے کہا کہ اقوام متحدہ کے امن مشنز میں پاکستان کی شرکت ہمیشہ نمایاں رہی ہے اور عالمی امن کیلئے اس کا کردار قابلِ ستائش ہے۔محسن نقوی نے قدرتی آفات کے دوران پاکستان کی بھرپور معاونت پر اقوام متحدہ کے سیکرٹری جنرل کا شکریہ بھی ادا کیا۔
